بىز ھەققىدە يىزىلغان نىمىسچە كىتاب ھەققىدە

ئانا تىل كۈنىمىزگە مۇبارەك بولسۇن!

ئانا تىل كۈنىنى بىر نەرسە يازماي ئۆتكۈزۋىتىشكە چىدىمىدىم.

دىيارىمىزنى زىيارەت قىلىدىغان كۆپىنچە چەتئەللىكلەر تەرجىمان ياردىمىدە ئايلىنىدۇ، ياكى ئازىراق خىتايچە ئۈگەنگەن بولىدۇ. تەرجىمانلىرىمۇ (ياكى ساياھەت يىتەكچىسى) كۆپىنچە خىتاي بولىدۇ. شۇڭلاشقىمۇ ئۇلار شۇ تەرجىمانلار قانداق چۈشەندۈرسە شۇنداق چۈشىنىشىپ كىلىدۇ. شۇنداقلارنىڭ يۇرتمىزدا كۆرگەن-بىلگەنلىرىنى ئاڭلاش ئەلۋەتتە، تەڭلىكنى سۆيگەن ئەقىل ئۈچۈن شۇنچىلىك ئاچچىق بىلىنىدۇ. قايسى بىر يىلى شۇنداق نىمىس بىرەيلەندىن يۇرتمىزغا بارغاندا تەرجىمان سەۋەبلىك كۆپ نەرسىلەرنى بىلەلمىگەنلىكىنى، ھەتتا تەرجىمانىڭ مىللەتچىلىككە تولغان چۈشەندۈرۈشلىرىنى ئاڭلاپ، بىزنى شۇ بويىچە چۈشىنىپ كەلگەنلىكىدىن ئېچىنغانىدىم.

يىقىندا گېرمانىيەدە نەشىر قىلىنغان ”ئۇيغۇرنىڭ زىمىنىدا (Im Land der Uiguren)“ دىگەن 154 بەتلىك (فوتو-سۈرەت بەتلىرىنى قوشقاندا 194) ئېخچام ساياھەتنامىسىنى سېتىۋالدىم. گەرچە تېخى يىرىمىنى تۈگەتمىگەن بولساممۇ، ئازىراق تەسىراتىمنى ئورتاقلاشقۇم كەلدى.

ئاپتور كىتابنىڭ مۇقاۋىسىنىمۇ شۇنداق ياخشى لايھىلەپتۇ، تەكلىماكاننى ئەسلىتىدىغان ئىسسىق سۇس سارغۇچ رەڭ، شۇ رەڭ ئېچىدە ئېشىكى بىلەن يەكشەنبە بازاردىن يانغاندەك، چىرايىدىن سۇلغۇنلۇق يىغىپ تۇرغان يالغۇز كېرىيە ئايالىنىڭ سىزما رەسىمىلا (رەسسام، فوتوگراف نىجات ھوشۇر ئەپەندى ئەسىرى) كىشىگە بىر خىل چىنلىق ھەم يىقىنلىقنىڭ، غىرىبلىقنىڭ كۆلەڭگىسىنى بەرگەن.

ئىنگرىد ۋىدىئارتو ئاپتورلۇقىدىكى بۇ كىتابنىڭ مىنى ھەممىدىن قايىل قىلغان يىرى، تەسىرات ۋە چۈشەندۈرۈشلەردىكى چىنلىق بولدى. ئوقۇۋىتىپ شۇنداق خوش بولدۇم، نەچچە يىرىدە، بىزنىمۇ چۈشىنىدىغان خەقلەر باركەن دىدىم. ھەم بۇ ئايالنىڭ كۆزىنىڭ ئۆتكۈرلىكىگە، ھەم كىتابنى يىزىشتىن بۇرۇن كۆپ نەرسىلەر ھەققىدە ئەتراپلىق ئىزدەنگىنىگە چىن پۈتتۈم. بەلكىم، مەلۇم بىر سەۋەبىلىرى، بۇ ئايالنىڭ ئۇيغۇر ساياھەت يىتەكچىلىكىدە بولغانلىقى، نۇقتىلىق ساياھەت رايونلىرىنىلا زىيارەت قىلماستىن، ئاددى كىشىلەرنىڭ ئۆيلىرىدە تۇرۇشى، دېھقان-چارۋىچىلارنىڭ تۇرمۇشلىرىنى كۆرۈشى، شۇنداقلا چەتئەلدىكى زىيالىلىرىمىز بىلەن بولغان سۆھبەتلىرى، يۇرتىمىزغا بىر قانچە قىتىم بىرىشى، ۋە شۇ يۇرتىمىزغا، خەلقىمىزگە بولغان مۇھاببىتى بولۇشى مۇمكىن. 40 بەتلىك فوتۇ-سۈرەت بەتلىرىگە ئۆزى تارتقان سۈرەتلەردىن باشقا، گېرمانىيەدە نەچچە قىتىم ماي بوياق ۋە فوتو-سۈرەت كۆرگەزمىلىرى ئاچقان، بېرلىن سەنئەت ئىنىستىتۇتىدا ئوقۇۋاتقان نىجات ھوشۇر ئاكىمىزنىڭ سۈرەتلىرىنىمۇ خىلى ئىشلىتىپتۇ.

ساياھەتنامىدە، تەبئەتكە بولغان قاراشلىرىمىز، تاماقلىنىش ئادەتلىرىمىز، قوش تىل مائارىپىنىڭ قانداق ئىكەنلىكى، پاسپورتتىكى ئېسىملىرىمىز، ۋىزا ئىلىش جەريانىدىكى ئاۋارچىلىقلار، ئانچە-مۇنچە تارىخى ئارقا كۆرۈنۈشلەر قاتارلىق كۆپ نەرسىلەر چىقىپ بولىدى 65-بېتىگىچە. كىتاب مەزمۇنى ھەققىدە ئارتۇق گەپ قىلماي، چىن يىزىلىپتۇ دىگەن گىپىمدىن ھىس قىلىۋالارسىلەر. ئوقۇپ بولغاندا بەلكىم يەنە تولۇقلاپ قويۇشۇم مۇمكىن تەسىراتلىرىمنى، ھازىرچە مۇشۇنچىلىك يىزىپ تۇراي.

كىتابنىڭ ئاخىرىدىكى تەشەككۈرنامىدە، ئاپتور تەكلىماكان گىرۋەكلىرىدىكى ساياھەتلىرىدە يىتەكچى بولغان ئۇيغۇر ياشقا ئالاھىدە رەھمىتىنى ئىيتىپتۇ. شۇنداقلا بېرلىن ئەركىن ئۇنىۋېرسىتېتىدىكى ئېتمولۇگ پېتېر رېھې، گۆتىڭېن ئۇنىۋېرسىتېتىدىكى تۈركولوگ، ياردەمچى پروفىسسور ئابلەت سەمەت، ئايشىتەت كاتولىك ئۇنىۋېرسىتېتىدىكى مۇھىتشۇناس، پروفىسسور ئۈمۈت خالىق ئەپەندىم ۋە بېرلىن تېخنىك ئۇنىۋېرسىتېتىدىكى پروفىسسور يوھاننېس كۈشلېر قاتارلىقلارغىمۇ رەھمىتىنى ئىيتىپتۇ.

تۆۋەندە بۇ كىتابنىڭ ئامازوندىكى ئادرىسىنى بەردىم، كىتاب باھاسى 20 ياۋرۇ. مەن تۇرغان شەھەردىكى كىتابخانىغا كەلمىگەن ئىكەن، كىرىپ سورىسام بىزدە يوقكەن، بۇيرۇتسىڭىز بولىدۇ، ئۈچ كۈندىلا تاپشۇرۇپ ئالىسىز دىگەن ئىدى، شۇ كىتابخانىدىن بۇيرۇتتۇم، دىگىنىدەك ئۈچ كۈندە تاپشۇرۇپ ئالدىم.

ئۈچ يىلنىڭ ئالدىدا دۇنيادىكى ئەڭ نوپۇزلۇق ژۇرناللارنىڭ بىرى بولغان، باش شىتابى ئامىركىدىكى دۆلەت جۇغراپىيەسى ژۇرنىلىدىمۇ ئىنتايىن ياخشى ماقالە بىسىلغان ئىدى بىز توغۇرلۇق (مەسيۇۋ تېگ ئاپتورلىقىدا، يەنە بىر تىبەت ناملىق ماقالە، ئۇلىنىشى بۇ يەردە)، شۇ ماقالىمۇ شۇنچىلىك بىر ئوتتۇرا نۇقتىدا يىزىلىپتىكەن. بۇ كىتابمۇ شۇ، ئىشقىلىپ مۇشۇ كۆپىنچە غەرىبلىكلەرنىڭ ئىلمى ئەسەر يازغاندىكى كەسىپچانلىقى ۋە ئىلىمنىڭ چىنلىقىغا بولغان ھۆرمىتىنى ئۈگىنىشكە ئەرزىيدۇ. ئەپسۇس، بېيجىڭدىكى خىلى خىلى پروفىسسور، ئاكادىمىك ئاتالغان كىشىلەرنىڭمۇ يۇرتىمىزغا كەلگەندە بىر تەرەپلىمىلىك ھىسسىياتتا سۆزلىشى كىشىنى ئەپسۇسلاندۇرىدۇ. بەلكىم كېيىنچە تۈزىلە…

ئەسلى كىتابنى نەشىر قىلغان ۋاگنېر نەشىرياتىدىكى كىتاب چۈشەندۈرمىسىنىڭ ئۇلىنىشىنى پەستە بەردىم. بەت ئاستىدا ئۈچ ئادەم كىتابقا باھا سۆزى يىزىپ، كىتابنىڭ ھەقىقەتەن كۆپ ئۇچۇرلار بىلەن تەمىنلىگەنلىكىنى، يۇرتمىزغا بارماقچى بولغانلارنىڭ چوقۇم ئالدىن ئوقۇشقا تىگىلىشلىك بىر كىتاب بولغانلىقىنى باھالاپ ياخشى ئىنكاسلار قالدۇرۇپتۇ، ھەم ئۈچلا ئادەم 5 يۇلتۇز بىرىپتۇ. بۇ ئىنكاسلار كىتابنىڭ ئامازوندىكى بېتىدىمۇ باركەن. بۇ ئىنكاسلارمۇ كىشىنى خوش قىلىدۇ.

http://www.wagner-verlag.de/Ingrid_Widiarto/Im_Land_der_Uiguren
http://www.amazon.de/Im-Land-Uiguren-Eine-Reiseerzählung/dp/3862796043

ھۆرمەت بىلەن

oghuzkb

2013-يىل 2-ئاينىڭ 21-كۈنى

Ulm

بۇ يازما ئۇنىۋېرسال, ئۇيغۇر + ياۋرۇپا, ئۇچۇر-خەۋەر كاتېگورىيىسىگە يوللانغان ھەم دەپ خەتكۈشلەنگەن. مۇقىم ئۇلانمىسىنى خەتكۈشلىۋېلىڭ.

بىز ھەققىدە يىزىلغان نىمىسچە كىتاب ھەققىدە ئۈچۈن 7 ئىنكاس بار

  1. niyazdixan مۇنداق يازغان:

    فون لىكوكنىڭ كىتابىنى ئوقۇسىڭىز ئۇنىڭدىمۇ قىممەتلىك ئۇچۇرلار بارتى.

    • ئاچىنۇق مۇنداق يازغان:

      بۇرۇنقى تارىخىمىزغا تارىخچىلاردىن باشقىلىرى ئانچە قىزىقىپ كەتمەيدۇ. نىمىسلار ساياھەت قىلىشقا بەك ئامراق خەق. بۇ كىتاب ساياھەتنامە، ھازىرقى كۈندە يىزىلغان، ھازىرقى ھالىتىمىزنى غەربىكە تونۇشتۇرىدىغان كىتاب. ساياھەتنامە بولۇشىغا قارىماي، ئاپتور كۆپ ئۇچۇر بىرىپتۇ باشقا تەرەپلەردىن. يىڭى بىسىلغان كىتاب بولغاچقا، قېرىنداشلرىمغا بىر ئۇچۇر بەردىم. قىزىققانلار، نىمىس تىلى ئۈگەنگەنلەر بىر كۆرۈپ باقسۇن دەپ.

  2. كىروران مۇنداق يازغان:

    كېچىكىپ كۆرۈپتىمەن بۇ يازىنىمۇ. بەك ياخشى خەۋەركەن…

  3. ئۈمىدى مۇنداق يازغان:

    نىمىس دەپ خەقنى كەمسىتىپ ئاتىماي گېرمان دەيلى!

    • ئاچىنۇق مۇنداق يازغان:

      بۇ كەمسىتكەن سۆز ئەمەس! بۇ ھەقتە بۇرۇن مەن كۆپ ئادەمدىن (رۇسلاردىن، نىمىسلاردىن، يېرىم رۇس، يېرىم نىمىس قانلىقلاردىن، ئوقۇغۇچى ئالىملاردىن سوراپ چىققان). نىمىسلار ئۆزلىرىنى دويىچ دەيدۇ. 10 خوشنىسى 10 خىل ئاتايدۇ.

  4. ئەقىل مۇنداق يازغان:

    ئەسسالام ئەلەيكۇم قۇربانجان ئاكا قۇلىڭىزغا دەت كەلمىسۇن ،تىمىلىرىڭىز ئۈزۈلۇپ قالمىسۇن .بەكمۇ سۇيۇندۇق .

    • ئاچىنۇق مۇنداق يازغان:

      ۋائەلەيكۇم ئەسسالام ئىنىم!

      ياقتۇرغىنىڭىزغا رەھمەت. يېزىپ تۇرۇشقا تىرىشىمەن، لېكىن خىزمەت بەك ۋاقتىمنى ئېلىپ كېتىۋاتىدۇ، يازىدىغان تېما كۆپ، ئولتۇرۇپ يازغۇدەك ۋاقت يوق.

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز

تۆۋەندىكى HTML تەگلىرى ۋە خاسلىقلىرىنى ئىشلىتەلەيسىز: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong> <img src="" alt="" class="" width="" height="">

https://achinuq.org/wp-content/plugins/wp-monalisa/icons/wpml_bye.gif 
https://achinuq.org/wp-content/plugins/wp-monalisa/icons/wpml_good.gif 
https://achinuq.org/wp-content/plugins/wp-monalisa/icons/wpml_negative.gif 
https://achinuq.org/wp-content/plugins/wp-monalisa/icons/wpml_scratch.gif 
https://achinuq.org/wp-content/plugins/wp-monalisa/icons/wpml_wacko.gif 
https://achinuq.org/wp-content/plugins/wp-monalisa/icons/wpml_yahoo.gif 
https://achinuq.org/wp-content/plugins/wp-monalisa/icons/wpml_cool.gif 
https://achinuq.org/wp-content/plugins/wp-monalisa/icons/wpml_heart.gif 
https://achinuq.org/wp-content/plugins/wp-monalisa/icons/wpml_rose.gif 
https://achinuq.org/wp-content/plugins/wp-monalisa/icons/wpml_smile.gif 
https://achinuq.org/wp-content/plugins/wp-monalisa/icons/wpml_whistle3.gif 
https://achinuq.org/wp-content/plugins/wp-monalisa/icons/wpml_yes.gif 
https://achinuq.org/wp-content/plugins/wp-monalisa/icons/wpml_cry.gif 
https://achinuq.org/wp-content/plugins/wp-monalisa/icons/wpml_mail.gif 
https://achinuq.org/wp-content/plugins/wp-monalisa/icons/wpml_sad.gif 
https://achinuq.org/wp-content/plugins/wp-monalisa/icons/wpml_unsure.gif 
https://achinuq.org/wp-content/plugins/wp-monalisa/icons/wpml_wink.gif